Ургийн хөгжлийн 37 долоо хоногоос өмнө төрсөн хүүхдийг дутуу төрсөн хүүхэд гэнэ. Хэдий чинээ хугацаанаасаа эрт төрнө төдий чинээ бага жинтэй байх ба биеийн бусад хэсэгтэй харьцуулбал том толгойтой харагдана. Түүнээс гадна арьсан доорх өөхлөг эд хөгжөөгүйгээс амархан даарна.

Хугацаандаа төрсөн хүүхдийн бодвол нам дуугаар, бага уйлна. Уушгины хөгжил гүйцээгүйгээс эхний хэдэн өдөр/долоо хоногуудад хүчилтөрөгч шаардагдаж болзошгүй. Энэ шалтгаанаар дутуу төрсөн хүүхэд амьсгалаа 15 секундээс удаан түжих нь элбэг тохиолдоно. Мөн 1.5 кг-аас бага жинтэй төрсөн хүүхдэд нүдний торлог гүйцэт хөгжөөгүйгээс үүсэх эмгэг элбэг тохиолдох тул нүдний эмчийн байнгын хяналт зайлшгүй шаардлагатай. Дутуу төрсөн нярай хүүхдэд шарлалт илүү хүнд, удаан явагдах, цус багадалт үүсэх өндөр эрсдэлтэй.