Кандида хэмээх мөөнгөнцөр эрүүл хүний арьс, амны хөндий, хоол боловсруулах зам, үтрээнд цөөн тоогоор ямар нэг шинж тэмдэг үүсгэхгүйгээр амьдарч байдаг. Харин энэхүү мөөгөнцрийн тоо хэмжээ ихсэхэд мөөгөнцрийн халдвар үүснэ.

2-оос доош насны хүүхдэд амны мөөгөнцөр элбэг тохиолддог. Нярай хүүхдийн хувьд ихэвчлэн төрөх замаар эхээсээ мөөгөнцрийн халдвар авах бөгөөд харин хөхүүл хүүхдийн хувьд амны хөндийн ариун цэвэр муу, угж соосгыг сайн ариутгаж халдваргүйжүүлэхгүй байх мөн антибиотик, гормон (преднизолон, дексаметазон) эмчилгээний хүндрэл хэлбэрээр тохиолдож болно. Түүнчлэн эхийн хөхний толгой хагарч үрэвсэх нэг шалтгаан нь арьсны мөөгөнцөр байдаг бөгөөд ийм тохиолдолд хүүхэд халдвар авч болно.

 

Ам мөөгөнцөртөх өвчний үндсэн шинж тэмдэг нь хэл, уруулын дотор тал, тагнай, буйл, жавьжаар цагаан өнгөр үүсэх явдал мөн.  Ам мөөгөнцөртөх нь хүнд өвчин эмгэг биш бөгөөд хүүхдийн биеийн байдал муу байдаггүй боловч дахилт өндөртэй.

Ихэнх тохиолдолд эмийн эмчилгээ шаардлагагүй, хэдэн хоногт өөрөө эдгэрнэ. Харин өөрөө эдгэрэхгүй олон хонох, хүүхэд хөхөндөө муудах, тайван биш өвдөлттэй байж болзошгүй тохиолдол, өвчин дахих, бусад эрхтэн тогтолцоонд халдвар тархаж байна гэж үзвэл мөөгөнцрийн эсрэг эмийн эмчилгээг эмч зөвөлнө. Эмчилгээний үр дүнд ойролцоогоор 2 долоо хоногийн дотор амны мөөгөнцөр эдгэрнэ.

Хүүхдийн ам, залгиурт байх цайвар өнгийн зангилаа буюу тунгалагийн эдийн (лимфоид эдийн) бөөгнөрөлийг амны мөөгөнцөр гэж андуу ойлгон арчиж цэвэрлэж гэмтээн өвдөлт үүсгэх нь буруу юм. Энэ талаар “Хүүхдийн ам, залгиурт байх цайвар өнгийн зангилаа юу вэ?” гэсэн мэдээлэлээс уншаарай.