К аминдэм нь цус бүлэгнэлтэнд онцгой чухал үүрэгтэй ба дээрх нээлт цус бүлэгнэлтийн олон эмгэгийг урьдчилан сэргийлэх, эмчлэх нөхцлийг бүрдүүлсэн юм.

К аминдэм жирэмсэн эхийн ихэсийг нэвтэрч урагт бараг дамждаггүй, хөхний сүүгээр маш бага ялгардаг тул нярай хүүхдийн цусанд өчүүхэн бага хэмжээтэй байдаг. Энэ нь нярай хүүхдийг ямар нэг шалтгаангүйгээр цус алдахад хүргэх аюултай. Жишээлбэл хүй, ходоод гэдэс, хамраас цус алдаж болох ба хамгийн аюултай нь тархинд цус харвах тохиолдол юм. Үүнийг К аминдэм дутлын цус алдалт гэнэ. К аминдэм дутлын цус алдалтыг эрт (төрснөөс хойш эхний 7 хоног) ба хожуу үеийн (2-12 долоо хоног) гэж ангилах бөгөөд эхнийх нь харьцангуй хөнгөн явцтай байхад харин хожуу үеийнх нь тархинд цус харвалтаар илрэх ба нас баралт 50% байдаг.

Дэлхийн улс орнууд 1960-аад оноос хойш төрсөн нярай хүүхэд бүрт К аминдэмийг уулгах эсвэл тарих аргыг хэрэглэж байна. АНУ, Канад, Нэгдсэн Вант Улс зэрэг орнуудад хүүхдийг төрмөгц К аминдэмийг булчинд 1 удаа тарьдаг. Энэ нь К аминдэм дутлын цус алдалтын эрт болон хожуу үеийн  эмгэгийг бүрэн урьдчилан сэргийлж чадна.

Харин зарим орнууд, жишээлбэл Австрали, Швейцарьт тарилгатай холбоотой өвдөлт, буглаа, бэрсүү, цус/мэдрэлийн судас гэмтэх, өртөг илүү өндөр зэрэг шалтгаанаар уух аргыг хэрэглэдэг. Хүүхдийг төрмөгц уулгах нь зөвхөн эрт үеийн цус алдалтаас сэргийлдэг. Хожуу үеийн цус алдалтаас сэргийлэхийн тулд 2 ба 3 дахь тунг заавал уулгадаг.

Манай оронд К амидэмийг төрсөн нярай бүрт тарьдаг тул дийлэнх хүүхдэд 2 дахь тунг тарих/уулгах шаардлага байхгүй. Гэхдээ К аминдэм дутлын хожуу үеийн цус алдалт үүсэх эрсдэлтэй доорх тохиолдлуудад 2 дахь тунг хэрэглэх заалт гарч болзошгүйг анхаарна уу.

Үүнд:

• Дутуу нярай
• Бүтэлттэй төрсөн нярай
• Төрөлтийн хүндрэлүүд (вакум соруулагч, эх барихын хавчуур)
• Элэгний эмгэгтэй нярай
• Нярайн эрт үедээ цус алдаж байсан
• Эх нь жирэмсний хугацаанд К аминдэмийн идэвхийг бууруулдаг эмийн бэлдмэлүүд (уналт таталтын эсрэг бэлдмэлүүд, сүрьеэгийн эмүүд, цефалоспорины бүлгийн антибиотикууд) хэрэглэж байсан.