Хүүхэд яагаад цочдог вэ?
Чанга дуу чимээ, огцом хөдөлгөөнд хүүхдэд цочих рефлекс автоматаар үүсдэг. Үүнийг эцэг эхчүүд хүүхэд айчихлаа эсвэл ямар нэгэн юмыг нь өвтгөчихлөө гэж ойлгох нь буруу. Хүүхэд цочих үед яг л та бидэн шиг зүрхний цохилт, амьсгалын тоо нь олширч, артерийн даралт ихэсч байдаг. Цочих рефлексийн илрэл хүн бүрт, хүүхэд бүрт харилцан адилгүй байна. Нярай хүүхэд дуу чимээнд цочиж байвал түүний сонсгол сайн байгааг илтгэх үзүүлэлт гэж ойлгоорой.
Хүүхэд эхээс мэндлэхдээ л энэхүү рефлестэй төрдөг. Төрсний дараа нярайн эмч эхний үзлэгээрээ цочих рефлекс буюу Морогийн рефлекийг (анх нээж илрүүлсэн Австрийн хүүхдийн эмч Ernst Moro-гийн нэр) шалгана. Түүний дараа ч хүүхдийн эмч/өрхийн эмч үзлэг хийхдээ энэ рефлексийг шалгаж байхыг эцэг эхчүүд олонтаа харсан байх.
Цочих рефлекс илрэхгүй байх нь тархи эсвэл нугасны гэмтлийг илтгэнэ. Харин нярай хүүхэд цочихдоо нэг гараа хөдөлгөхгүй байх нь төрөлтийн элбэг тохиолддог хүндрэл болох эгэмний хугарлын нэг шинж байдаг. Эмгэг Морогийн рефлексийг (хүчтэй илрэх эсвэл дарангуйлагдсан байх) зөвхөн эмчийн үзлэгээр илрүүлнэ. 6 сартайд хийх эмчийн үзлэгээр энэ рефлекс бүрэн арилсан байх ёстой. 6 сараас хойш Морогийн рефлекс илэрч байх нь төв мэдрэлийн тогтолцооны хүнд эмгэгийн шинж юм.
Эхний хэдэн сар хүүхэд унтаж байхдаа ч цочих нь хэвийн үзэгдэл юм. Учир нь тэд биднээс хавьгүй их зүүдэлдэг. Гарыг хөнгөн өлгийдөх нь нярай хүүхдийг сайн унтуулахад тустай гэдгийг ээжүүд сайн мэддэг.
Хэтэрхий их цочимтгой хүүхэд хөхөж байх үедээ цочих нь хахаж цацаж улмаар амьсгал боогдох аюултай. Түүнчлэн маш ховор тохиолдолд удам дагасан цочих өвчин, цочихоос үүдэлтэй таталт тохиолддог.
Хүүхэд ялимгүй зүйлд их цочих эсвэл огт цочихгүй байх, 6 сартайгаас хойш цочих рефлекс илрэх тохиолдолд заавал хүүхдийн эмчид хандаарай. Хүүхдийн эмч жирэмслэлт, төрөлт, удамшлын асуумж авч булчингийн хүчдэл, бусад рефлексийн илрэлийг шалгаж, бие бялдар, сэтгэц оюун, булчингийн хөгжлийг үнэлэн хэрэв шаардлагатай гэж үзвэл MRI, тархины цахилгаан бичлэг зэрэг шинжилгээнд илгээж болно.